Mugi Sistema eredu da Bartzelonan

Gipuzkoako herritarrentzat autobusa edo trena txartela berarekin ordaintzea eta deskontuak jasotzea ohikoa izan daitekeen arren, Bartzelonan bizi direnek 80 bonuen artean aukeratu behar izaten dute beraien garraio metropolitarrean ibiltzeko. Horregatik, agintariek sistema erosoago bat eskaini nahi dute, garraio publikoa sustatzeko eta gehien erabiltzen dutenei hobariak emateko.

GGLAko lehendakaria, Marisol Garmendia, Bartzelonan izan da Bartzelonako Garraio Metropolitarraren Agintaritzako (ATM) kideekin. Zuzendari orokorra den Pere Torresek lehen eskutik ezagutu nahi izan ditu Gipuzkoako tarifa sistema bateratua eta garraio publikoaren deskontuak. Marisol Garmendiak adierazi duenez "Gipuzkoan garraio publikoaren erabilera handitzen ari da eta erabiltzaile kopurua igotzen ari da Mugin integratutako operatzaile guztietan". Mercedes Vidalek, Udaleko Mugikortasun Zinegotziak, Mugi Sistema "izugarria" iruditzen zaiola nabarmendu du.